Est 5 | Ndebele | STEP | Kwasekusithi ngosuku lwesithathu uEsta wagqoka ezobundlovukazi , wema egumeni elingaphakathi lendlu yenkosi, maqondana lendlu yenkosi. Inkosi yayihlezi esihlalweni sobukhosi sombuso wayo endlini yesikhosini iqondene lomnyango wendlu .

1 Kwasekusithi ngosuku lwesithathu uEsta wagqoka ezobundlovukazi ^a, wema egumeni elingaphakathi lendlu yenkosi, maqondana lendlu yenkosi. Inkosi yayihlezi esihlalweni sobukhosi sombuso wayo endlini yesikhosini iqondene lomnyango wendlu ^b. 2 Kwasekusithi inkosi ibona uEsta indlovukazi emi egumeni, wazuza umusa emehlweni ayo ^c; inkosi yasimelulela uEsta intonga yobukhosi yegolide eyayisesandleni sayo. Wasesondela uEsta wathinta isihloko sentonga yobukhosi ^d. 3 Inkosi yasisithi kuye: Ulani, ndlovukazi Esta? Lesicelo sakho siyini? Uzasinikwa ngitsho kuze kube yingxenye yombuso ^e. 4 UEsta wasesithi: Uba kukuhle enkosini, kayize inkosi loHamani edilini engiyenzele lona. 5 Inkosi yasisithi: Phangisisani uHamani ukuthi enze ilizwi likaEsta. Ngakho yeza inkosi loHamani edilini uEsta ayelenzile.

6 Inkosi yasisithi kuEsta edilini lewayini ^f: Siyini isicelo sakho? Njalo uzasinikwa. Siyini-ke isifiso sakho ^g? Kuzakwenziwa ngitsho kuze kube yingxenye yombuso ^h. 7 UEsta wasephendula wathi: Isicelo sami lesifiso sami yilokhu: 8 Uba ngithole umusa emehlweni enkosi, futhi uba kukuhle enkosini ukupha isicelo sami lokwenza isifiso sami, inkosi loHamani kabeze edilini engizalenzela bona. Kusasa-ke ngizakwenza njengokwelizwi lenkosi ⁱ.

Ukuziphakamisa kukaHamani lokuthukuthela kwakhe

9 UHamani wasephuma mhlalokho ethokoza elenhliziyo enhle ^j. Kodwa uHamani ebona uModekhayi esangweni lenkosi ukuthi kasukumanga lokuthi kamthuthumelelanga, uHamani wagcwala ulaka ngoModekhayi ^k. 10 Kodwa uHamani wazithinta, wafika endlini yakhe; wasethuma walanda abangane bakhe ^l loZereshi umkakhe ^m. 11 UHamani wasebalandisela udumo lwenotho yakhe, lobunengi bamadodana akhe ⁿ, lakho konke inkosi eyayimkhulise ngakho ^o, leyamphakamisa ngakho phezu kweziphathamandla lenceku zenkosi ^p. 12 UHamani wasesithi: Yebo, uEsta indlovukazi kangenisanga muntu kanye lenkosi edilini alenzileyo ngaphandle kwami; njalo lakusasa nginxuselwe kuye lenkosi ^q. 13 Kanti konke lokhu kakungenelisi ngalutho ngaso sonke isikhathi ngibona uModekhayi umJuda ehlezi esangweni lenkosi.

14 UZereshi umkakhe labo bonke abangane bakhe basebesithi kuye: Kakwenziwe ugodo ubude obuzingalo ezingamatshumi amahlanu; kusasa-ke uthi enkosini kabalengise uModekhayi kulo, ubusungena lenkosi edilini uthokozile. Njalo loludaba lwalulungile phambi kukaHamani, waselwenza ugodo ^r.